上海解放第一声

微信扫码看视频听钱程沪语朗读

◆储有明

今年是上海解放七十七周年。一九四九年五月二十五号一大早，全上海个老百姓刚刚从困梦头里醒过来，就从屋里个无线电——也就是老上海讲个“玻璃电台”里向，听见播音员李云森喜气洋洋个声音：“上海解放了！人民解放军已经开到了南京路！”迭个消息一下子传遍上海。接下来，播音员一字一句，完整播报了《中国人民解放军布告》。

讲到“玻璃电台”，老上海侪有印象。伊就开辣南京路四大百货公司之一个新新公司五楼，是一家民营广播电台。伊原本个名字叫“凯旋电台”，只勿过整间播音室四面全部是落地透明玻璃。电台里向所有个电器设备，还有播音员坐辣台子前头工作个样子，统统侪拨来新新公司买物事、兜白相个客人看得清清爽爽。就因为搿副透明别致个样子，上海人统统叫伊“玻璃电台”，反倒让伊原本个名字“凯旋电台”几乎被人忘记脱了。

上海人天生欢喜轧闹猛、看新鲜。当年到新新公司买东西，顺带手就能望望玻璃里向打扮得山青水绿个播音小姐。更有勿少戏曲名家、滑稽名角轮番来此地播音，老百姓立辣外头免费看热闹，真真是勿出铜钿看白戏，噱头十足，天天人头攒动、热闹非凡。

讲到新新公司，1926年正式开张营业，算是南京路四大百货里个“小阿弟”。伊比贴隔壁、1917年开业个先施公司晚开九年，也比斜对面、1918年开业个永安公司晚了八年。前头两家侪是上海滩百货行业个老大哥，根基深、名气响，新新公司想要立足，自然要多动脑筋。当时个先施、永安两家百货公司侪是辣英国伦敦注册登记个洋行背景，主要卖各种进口洋货。新新公司则是一家国内注册个本土商业公司，主要卖国产货，勿卖洋货。

埃歇辰光，上海个时髦小姑娘、阿姨妈妈，侪欢喜穿进口乔琪纱做个旗袍，面料闪闪发亮，走辣马路浪向风头十足。新新公司看准潮流，顺势打出爱国国货招牌，首创用本土“阴丹士林”布料制作旗袍，引领新风尚。新新公司还专门邀请电影明星、时髦模特，辣二楼纺织品展厅办了一场又一场阴丹士林旗袍时装秀。整场走秀实况，侪通过五楼个玻璃电台同步直播。一传十、十传百，消息传遍上海滩，上海女同胞顿时掀起一股阴丹士林旗袍热潮。就靠搿只别出心裁个玻璃电台，新新公司硬生生从激烈个百货竞争里杀出重围，立稳了脚跟。

而搿只赫赫有名个玻璃电台，留拨老上海最难忘、最有分量个高光时刻，就是1949年5月25号，传出了振奋人心个上海解放第一声。一道电波，定格了上海迭座城市个新开端，成为永勿褪色个红色记忆。