球场贵所以球票也贵

娄一晨

本周一晚上，老娄和多位老友欢聚，话题自然离不开世界杯。

一见面，S就拉着我问：娄兄啊，我听侬解说讲洛杉矶格只球场造价要50几亿美元？介吓人啊？

我：呵呵呵，迭额倒是真呃，洛杉矶迭只球场我去过呃，是本届世界杯所有球场里厢最新额一只，2020年刚刚投入使用。伊为啥造价介高？因为离洛杉矶机场近，好像只有5英里还是5公里，所以建筑高度受飞行高度限制，只好往地底下挖。迭额生活一记头上难度来，往下头挖100英尺，差勿多30米。

J一下被惊到了：啥么事？往地底下挖了30米？迭额勿是造球场，简直是造地铁。

大家都笑。

Y也加入进来：老娄啊，我昨日刚刚从美国回来，看了三场小组赛。英格兰VS克罗地亚，蛮灵呃蛮灵呃。伊只球场，达拉斯体育场，里厢只高清大屏挂了球场顶廊厢，绝对弹眼落睛！

我大笑：哈哈哈，兄弟啊，达拉斯迭只球场我也去过呃呀。2011年2月，我坐了里厢解说超级碗。迭只球场20年前开工额辰光造价就已经是15亿美元。伊有的三大卖点：1.顶棚开关是沿牢房顶廊厢额弧形轨道朝两面打开。2.2009年开放使用额辰光看台观众容量超过10万人。3.就是侬讲额迭只高清大屏，正反两面，49米×22米。左右两面还有两块小额屏幕。2009年装上去额辰光，屏幕清晰度已经是1080P了。最吓牢我额是迭额老鬼三600吨重！就搿能介挂了房顶横梁廊厢。

众人一阵唏嘘。

S又问：娄啊，美国勿是交关地方公共设施年久失修，一塌糊涂吗？哪能掿出来额世界杯球场倒是蛮登样呃嘛？

我：迭额完全是两桩事体，地方公共设施建设归政府部门管，世界杯球场完全是私人老板额产业。美国搿趟一共11只世界杯球场全部是NFL职业橄榄球队额主场，投资建设维护全部侪是球队老板出钞票。刚刚阿拉讲到额洛杉矶球场就是洛杉矶公羊队老板克伦克投资，哦对了，也是英超阿森纳队额老板。

J：老娄啊，个么伊拉迭眼球场赚钞票伐啦？

我脱口而出：当然咯！NFL橄榄球联盟是全世界最赚钞票额体育联盟！去年额数据，32支球队，272场比赛，场均观众毛7万人。电视转播权就更加勿谈来，每年超过100亿美元！

Y一声叹息：怪勿得搿趟世界杯门票卖了介鉅。