老友闲话

娄一晨

老X是我40年的老友，大学时期就赴日本求学。随后又在日本工作生活多年。前几天，老X和我一起吃饭，聊起了自己的一桩心愿。

X：娄兄啊，我最近几年蹲了上海一直想做一桩事体。但是，一直就做勿起来……

我：兄弟啊，侬老早就已经事业有成，家庭幸福，啥地方还有介许多未竟之事啦？

X：唉，侬晓得个呀。我蹲了日本额辰光老欢喜看伊拉额职业棒球比赛，日文里厢叫“野球”。我有好几个日本朋友就是做棒球教练额。哦，当然，伊拉只是业余教练，教小朋友打打球。伊拉侪帮我讲过有勿有机会能组织一点中国额小朋友到日本去学习、训练棒球技术。

我频频点头：嗯，好像我前头几年也听说过有迭额消息。

X：是呀，日本现在国内足球联赛规模越来越大，足球明星到欧洲去踢球越来越多，下头小朋友啦、家长啦基本廊侪已经捺足球摆到第一位来……所以我迭眼棒球教练朋友是要急额呀……伊拉甚至于帮我讲中国小朋友哪怕一点点棒球基础呒没也覅紧！只要小朋友和家长同意，伊拉就一定全力以赴负责教好！

我：老兄啊，事体勿是介简单额。体育项目培训蹲了阿拉国内只好算是新兴行业，目前主要集中了足球篮球几额大球项目，啥地方轮得到棒球？太小众来……

X：所以呀，我前头勿是讲了嘛？小朋友哪怕一点点棒球基础也呒没也覅紧呃呀……

我：阿拉国内现在开展了比较好额体育培训主要侪是依托教育部门，蹲了各个中小学里厢开展。像侬搿能介零敲碎打一个两个或者几个来培训，还要拉到日本去，难度勿是一点点……而且，对于家长来讲，大多数人连棒球是啥也没搞清爽，更加覅讲送出去以后要用脱多少钞票来……

X：钞票当然是要考虑额。但是，小朋友到日本去参加培训，今后是有机会出头进到职业俱乐部，好成为明星额呀……像大谷翔平迭能介额明星球员，现在蹲了美国也是红得来发紫……

我：喂喂喂，阿哥啊，侬帮我讲大谷翔平我是晓得额呀，但是侬到上海马路廊厢去问问看，有几个人听说过？棒球运动蹲了阿拉国家额基础实在太差了，完全是可以忽略勿计额……所以，侬假使只是想寻小猫两三只，估计还是有可能呃。但是，也只是限于上海北京搿种一线城市。

X沉默，然后长叹：唉，我相信侬老兄讲了是对呃……算了，就当我今朝啥么事也呒没讲……