崇明六月黄炒年糕

◆ 沈一珠

昨日画室里，写生个对象是一盆粉粉糯糯个重瓣桔梗，粉红、奶白个球形花朵像煞一只只冰淇淋球；只勿过，心意勿同，能力勿均，表现出个结果也各式各样，有个通透点，花瓣再多也是轻盈个，层层叠叠个颜色，像蓝天下个云；也有个厚重点，花瓣真个密密实实凝成一只只冰淇淋球……

勿过，又有啥要紧呢？画画这种事体，一旦离开了功利，剩下来就全部是美好，像搿歇辰光，啥人还记得窗外头闷热、潮湿，或者是雨水滴答，眼门前分明就是盛夏季节冰室里每人捧一份双球冰淇淋，心无挂碍。

接下去还是每周四个欢乐夜饭辰光。搿天饭台子上个主角是一碟崇明六月黄炒年糕。崇明六月黄整个尝鲜期顶多也就持续到8月中旬，勿过，黄金时期也就眼门前迭一歇歇辰光，顶多再过半个号头，价钿也会落下来——一分价钿一分货，大家侪懂个。

刚刚完成第三次蜕壳个“六月黄”（指没完全成熟个小公蟹），一般勿超过3两，壳薄、肉嫩，蟹黄丰富还是流沙状态，入口特别细腻鲜甜。崇明吃法比较常见，汏清爽对半切开，切面蘸点面粉煎到金黄，葱姜煸炒，上海人欢喜加点迭个辰光个新鲜毛豆子，加水烧滚，合好味道，再加点面糊糊勾芡就好。

欢喜个人老欢喜，因为每一滴拖泥带水个汤汁里全是十足个鲜味，所以，用伊拌饭就是将鲜味吃到穷尽；勿喜欢个人老嫌比，黏滋滋糊搭搭勿够爽气。

眼门前搿碟六月黄炒年糕出自象山厨师之手，蟹是切开后蘸薄薄交一层生粉，热油里炸到外焦里嫩，吃到嘴巴里，壳松肉嫩；用葱姜、黄酒、生抽、盐、糖快速翻炒，又加了手指年糕、稍许一点点热水，焖烧片刻，大火将汁水收到浓稠，齐巧可以让年糕挂满咸香甜鲜。

崇明面拖蟹也好，象山油酱烧（蟹）也好，好吃个道道是六月里个美味限定：蟹壳里初初成熟个流沙黄会乳化辣汤汁里，拿年糕或毛豆表面裹一层鲜。