老味生煎忆少年

◆ 管 弢

上海千千万万种市井味道当中，到现在最叫我牵记个，就是萝春阁个生煎。就搿一口平平常常个烟火气，成了我最难忘个记忆。

迭种生煎是用半发面做个。面皮蛮有嚼劲，底子煎得金黄。轻轻咬开，肉馅嫩滑，满嘴侪是鲜香汤汁。一客生煎配一碗咖喱牛肉粉丝汤，热乎乎吃下去，小辰光个快乐，就是介简单。

四川北路浪个萝春阁，就辣我去学堂个必经之路浪向。店堂里铁锅滋滋响，白茫茫个热气从锅边腾腾升起来，绕来绕去，肉香搭面香混辣一道，慢慢叫散辣空气里。每次经过，侪能闻到店里飘出来个香味，勾得心里痒痒个。埃歇辰光我最大个心愿就是考出好成绩，爷娘奖励去萝春阁吃生煎。

大学毕业之后，我出国读书。隔仔千山万水，再也吃勿到搿一口熟悉个味道。实在牵记，就自家动手试着复刻。一开始拿超市速冻饺子煎煎解馋，样子勿像，味道更是勿搭界；后来跟北方同学学揉面、包包子、喷油、加水、焖煎，慢慢交摸出自家改良个做法。样子勉强有点像了，但是吃口呒没办法搭记忆里个老店比，差得老远。自家做个终究是将就，替代勿了记忆里原汁原味个少年味道。

岁月流转，世事起落，曾经关脱个百年老店萝春阁重新开张了。听到搿个消息，我心里老开心，特地约仔几个老早个小姐妹，一道回去寻少年辰光个味道。

老友碰头，故味重寻。半斤热气腾腾个生煎端上来，还是老样子：底脆、皮软、汤鲜、肉嫩。一口咬下去，侪是熟悉个味道，拿尘封多年个少年记忆全部唤醒。大家坐辣一道，聊聊读书辰光个老师同学，讲讲放学路浪个趣事闲话，时光好像悄悄倒流，又回到无忧无虑、清清爽爽个少年时代。细细想想，叫人念念勿忘个，从来勿单单是生煎个味道。

上海城市日日更新发展，身边人来人往，只有老店搿一口老味道，长年累月沉淀下来，一直呒没变过。一客简简单单个生煎，一缕市井烟火。留辣我心里向个，是老上海个旧日情调，也是我最珍贵个少年记忆。