其实搿个叫芸雅的年轻女孩才是美好本身。 沈一珠 绘
◆ 沈一珠
又收到芸雅寄来个包裹,搿趟是栗子,新鲜得勿得了,尖尖个头浪还带点毛刺。伊讲,是自家上山摘个,原生态,寄点拨阿拉尝尝味道,宜兴个板栗好吃,肉头特别细腻……
又想起今年春末夏初,跟牢老老夏到宜兴写生碰着伊个事体。辰光已经剩半日天就要回转了,随便寻了酒店旁边一家咖啡馆外头,一块背阴个空地。老老夏架好画架,动笔呒没多少辰光,就看见一个年轻姑娘逆着光,轻轻松松走过来。人长得老秀气,笑起来清清爽爽,开口讲:“亻那辣辣画画啊?帮亻那拍几张照片可以口伐?亻那看上去真美好呀……”后来晓得,伊叫芸雅,就辣辣搿家咖啡馆上班,空下来欢喜拍照。伊从小搭祖母一道过日脚,已经成家,还有一个可爱个小囡……就搿样,隔仔几百公里路,阿拉多了一门呒没血缘个亲人。
夏初个辰光,芸雅寄过来个,是伊祖母亲手采、亲手晒个茶叶搭笋干,还有宜兴特有个乌米。眼门前搿点栗子,是芸雅搭伊祖母一道上山,刚刚打下来,自家剥脱刺球取出来个大油栗……唉,想想看,其实搿个叫芸雅个姑娘才是美好本身。
高级感个烤板栗:
栗子汏干净,拿剪刀辣壳浪剪一条口子,清水里向浸十分钟左右,捞出来揩干。空气炸锅180摄氏度烤一刻钟,拿出来,白糖或者蜂蜜兑一点点温水调糖水,每粒栗子浪刷一层,再烤六分钟上下,闻到焦香就好出锅。
侬也可以试试最朴素个吃法:栗子照样前头搿能介处理好,勿刷糖水,直接空气炸锅180摄氏度烤廿分钟,烤到壳裂开、香气出来就可以。趁热吃,宜兴大油栗自带个甜,口感交关纯粹,味道斜气高级。
栗子炖鸡:
宜兴大油栗搭鸡一道炖,也是绝配。栗子放开水里煮两三分钟,趁热剥脱硬壳搭里向一层薄衣,搭焯好水个鸡块摆辣一道,加适量水,大火烧开转小火焖半个钟头,最后大火收汁就好了。栗子吸饱肉汁,粉粉甜甜,比鸡肉还要好吃。当然,像搿种山里刚刚采下来个大油栗,甜度搭粉糯程度侪比较好,味道要浓交关。