郑福斋与酸梅汤

◆储有明

上海一向海纳百川，各地个点心零食，侪到上海八仙过海、各显神通。大概一百多年前，上海个戏曲演出市场闹猛得勿得了。当时梨园行里侪认一桩事体：京城里个名角，假使辣上海唱勿红，就勿算真个名角。

20世纪初，上海开出交关设备齐全个新式戏馆。每天夜场六点钟开演，正戏之前先演《小放牛》《连升店》迭种开锣小戏；后头再开大戏，一直唱到半夜里。

看戏个观众为了看完整场戏，常常来勿及吃夜饭，就买好点心、卤味带进场，一边看戏一边吃。所以当时每爿大戏馆旁边，总会开一家茶食糖果店。迭些茶食糖果店侪是前店后作坊。每天下半日四五点钟开始，店里店外飘满烘糕饼个香味。刚刚出炉个椒盐一口酥、鲜肉月饼、鲜肉饺、苔条麻花，热烘烘，拨准备进戏馆看戏个戏迷一抢而空。戏馆里向个领票、案目也会辣幕间休息个空档，推销鸡汤白汁豆腐干、五香素火腿、茶叶蛋，赚点外快补贴。

当时上海有四大舞台，每家戏院附近侪有一家做出名气个点心店。大舞台对过有两家“天晓得”一家“文魁斋”，天蟾舞台对门是苏式糕饼店“稻香村”，中国大戏院对过有苏式茶食铺“老野荸荠”，共舞台隔壁就是京式茶食糖果店“郑福斋”。其中个郑福斋是南派猴戏鼻祖郑法祥搭仔几个朋友合伙开个。当时郑法祥辣共舞台场场爆满，看准苗头，索性辣戏馆大门旁边开出郑福斋，专门做京式茶食糖果。伊花大价钿从京城请来原本清宫御膳房做满汉点心个师傅，拿宫廷里向个蜜三刀、驴打滚、枣泥茯苓饼、豌豆绿、自来红，原汁原味搬到上海。生意一下子红红火火，铜钿滚滚来。

郑福斋还有一样招牌物事，就是酸梅汤。拿乌梅迭些药材，加冰糖、蜂蜜，照御医方子独家秘造。迭个是宫廷古法饮品，靠天然原料上色，勿加防腐剂、其他添加剂，当年慈禧太后热天顶欢喜吃。大热天太阳火辣辣，一杯冰酸梅汤落肚，顿时消暑解热，晶晶亮、透心凉，适意得勿得了！