排门板浪打乒乓

◆ 钱红春

啥叫“排门板”？就是老早小店打烊辰光用来关门个门板。

门板呒没统一规格，全是按照店面个高度搭宽度定做个。有个是整块大板，也有个是好几块长木板加横档拼起来。店面顶浪搭地浪，侪有固定门板个木槽。打烊关门，拿门板一块接一块插进上下木槽，拼拢来。全部装好之后，门板朝外一面当中，还要架一根比店面宽度稍许长一眼个横档。一头嵌进一边墙浪个铁箍，另一头扣到对面活络、好上锁个铁箍里。

排门板看看简单，做起来要求蛮高。一块块试拼，再慢慢修整，拼好之后板搭板之间要密勿通风。所以每块门板侪有固定位置。为了勿搞错，门板反面侪写好编号，要按编号拆装，勿好乱调。号码错脱，板就合勿拢、装勿上，店门也就关勿牢。上海闲话叫伊排门板，不光是门板要并排装，还有排队、按次序个意思。

我小辰光住个弄堂里，有爿烟纸店。老板约莫五十出头，头发已经落光。伊矮矮胖胖，为人交关和气，勿管大人小囡来买物事，侪客客气气。店里个门板侪是六七尺长、一尺来宽个松木板。早浪开门，伊搭老板娘一块一块卸下来，竖辣店门口边浪。夜里打烊，两家头再一块块装回去。因为两夫妻就住辣店里，店面侧边另有扇进出小门，所以门板外头个横档，一头只到门框为止。埃辰光弄堂里交关人辣附近厂里做中班、夜班，就算店打烊也勿怕。要买物事，店当中一块门板浪有一扇小窗，轻轻敲两记，老板就开窗接应，交关方便。

讲起搿爿烟纸店个排门板，有桩事体，我现在想起来还是蛮感动。

我读小学三年级辰光，从爷娘拨我买早饭个铜钿里，每日省一眼，好勿容易攒钞票买了乒乓球搭球拍。学堂里一到课间或者放学，就打一歇乒乓。学堂里只有一张乒乓台，经常抢勿到，只好辣水门汀地浪划道线凑合着打。

有一年暑假，一天夜快头，弄堂里几个小朋友喊我一道打乒乓。啥地方打好呢？有人讲搬屋里台子矮凳出来，但是高低勿齐，勿来三。像学堂一样辣地浪打，弄堂又是弹硌路，更加难打。迭个辰光，有一个小朋友朝烟纸店门边个排门板指指，搭我咬耳朵：借几块门板，拿小矮凳一搁，就好当乒乓台了。

我一听，就搭大家跑到店门口搭老板商量。老板本来想摇头，刚好老板娘出来厾垃圾，听见之后，非但答应，还帮阿拉一道搬门板。

搿天阿拉一直打到天慢慢暗下来才歇手，随后一道动手拿门板原样摆好。后来拨阿爸晓得了，差一眼就要吃生活。伊讲搿是人家吃饭家什，哪能好随便借。从搿趟之后，我再也呒没去借过排门板。