过年辰光个檀香橄榄

微信扫码看视频听钱程沪语朗读

文/惑斋

我从小就觉着，搭橄榄有关个一切，侪斜气有意思。

橄榄，大家一般叫伊“青果”或者“青橄榄”，勿单单福建人欢喜伊，阿拉上海人也习惯叫伊“檀香橄榄”。小辰光年初一到正月半搿段拜年个日脚里，还听到有人叫伊“元宝”。“恭喜发财”是拜年辰光蛮经常讲个吉利话，就算财神菩萨呒没空管到每一个人，但只要愿望是好个，拿橄榄叫成“元宝”当然是可以个——过年嘛，橄榄个名头也应该豪华一点！

新年头几天，阿拉搿点小囡大清老早就穿仔一身新衣裳，乖乖交坐辣角落头里，看姆妈帮客人端茶倒水。姆妈总归要辣茶盘边浪摆两只碧绿生青个橄榄，老有仪式感个！台子浪还有之前就准备好个金橘、糖莲心、酱油瓜子、蜜饯，放辣高脚玻璃果盆里，摆得齐齐整整，台子浪还有交关糖果花生。街面浪勿停传来噼哩啪啦放鞭炮个声音，弄堂里打招呼侪是“恭喜发财”“大吉大利”“身体健康”“同喜同喜”……

勿过埃歇辰光我还勿懂元宝是啥物事，顶感兴趣个是压岁钿，还有客人离开以后，留辣茶盘边浪两头尖尖个橄榄核。搿眼橄榄核，拨阿拉汏得清清爽爽，归到一堆，就成了顶好白相个物事。辣冬天个太阳底下，阿拉辣台子浪撒开橄榄核，用手指头从就近两粒核当中虚画一条线，再用大拇指扣牢中指，弹一粒去撞另一粒，打中就赢进，打勿中就输脱……搿种白相，比个是手指头个劲道、眼光，还有判断力，赢了能开心老半天。

等春天蚕豆上市了，也可以用晒干个蚕豆来白相迭个游戏，但屋里大人是勿肯让阿拉浪费个，呒没多少辰光就会全部收脱，用菜刀劈开干硬个豆壳，剥出豆肉来油氽豆瓣，或者烧咸菜豆瓣酥。迭个辰光，阿拉就重新拿出囥好个橄榄核，继续白相。其实大家也勿在乎输赢，白相好之后，“战利品”统统收进台子个小抽斗里，各自看书、聊天、吃饭、睏觉，下趟再来。

我常常辣弄堂口、马路边看到别家小囡用粉笔画地为圈，白相“顶橄榄核”，可惜阿拉屋里大人勿许我去，伊拉讲搿种是“野小囡”个白相法，地浪龌龊来兮，吃相又难看。我也亲眼看到有几个小囡白相到一半就打起来了，真搞勿懂伊拉为了几粒橄榄核有啥必要打相打！勿过打过闹过，转头又凑到一道白相了……有一趟，有一个小囡拿出一粒大得吓煞人个“橄榄核大王”，至少有普通两粒个大小；伊还神秘兮兮对我眨眨眼睛，其实我老早就看到伊辣墙角落里，用锉刀“修理”啥物事。结果大家一鉴定，一致讲搿是一粒磨平了凹凸个水蜜桃核，呒没资格参加游戏！

我也晓得，白相“顶橄榄核”其实勿容易：要立直身体，睁一眼闭一眼，用手指头轻轻夹牢一粒橄榄核，瞄准地浪用粉笔画个圈圈里个目标，再果断松手。能拿地浪个橄榄核顶出圈就算赢，否则手里个橄榄核就输拨人家了。我也辣屋里偷偷练过，结果勿但呒没成功，还因为拿大人裁衣裳个彩色划粉辣地浪画圈，吃了顿牌头。

唉，真心讲，橄榄核是阿拉童年顶好白相个物事之一！