白相抽陀螺

文/史美龙

去贵阳旅游，落脚亲眷屋里。搿天伊带我上街，无意间发现当地老流行白相抽陀螺。一群人辣广场各占一方，抽陀螺个鞭子“啪啪”响，陀螺转得风生水起、虎虎生威，人人都开心得满面春风。

亲眷看我交关眼热，回去翻出根彩色鞭子、一只平顶陀螺。搿只陀螺拳头大小，红木质地，做工老精细个。上头有绕鞭子个凹槽，下头有平衡旋转个线条，圆锥形螺角光滑匀称，看得出是车床刀头细巧切削个功夫。

灵勿灵，看表现。亲眷拿鞭子辣陀螺身浪绕三圈，随后用力一拉，陀螺像发球一样飞落地面，打只弯就定定心心转起来了。眼看摇摇晃晃要躺倒，鞭子“啪啪”两抽，惯性一恢复，又转得威风凛凛。亲眷白相陀螺得心应手、轻松自如，功底老深个。我依葫芦画瓢学了好几趟，陀螺就是犟头倔脑勿听闲话，从手里发出去就滚到角落头，让我出尽洋相。介简单个游戏，学起来交关吃力，只好叹口气，怪自己笨手笨脚。

回上海后，我拿陀螺看了半天，突然有个念头跳出来：亲眷是站着“发球”启动，难度老高个，格么改个方式，蹲辣地面定位启动，是不是来三呢？想到此地，趁天气晴好，走到小区广场去试。哪能晓得，左手右手老是勿搭班，定位启动个陀螺摇摇晃晃，像吃饱老酒个样子，甚至于睏倒转，活脱脱“打醉拳”。正巧亲眷打视频电话过来，一诊断才晓得，问题出辣右手拉鞭子、左手放陀螺勿同步，差半拍就转勿起来。经伊点拨，我反复练，陀螺终于四平八稳转起来了。看到操作成功，总算松了口气。

学会抽陀螺，白相起来真个会上瘾，茶余饭后总想着出去耍耍。有辰光白相得忒投入，还差点闯穷祸。一天，正辣全神贯注抽陀螺个辰光，身后突然“哇呀”一声。回头一看，一个小朋友捂着脸眼泪汪汪个。原来抽鞭子个辰光，梢头顺势往后撤，凑过来看新鲜个小朋友来勿及躲，眼睛旁边被刮到一记。虽然呒没啥大影响，但吓得我神经紧绷、头皮发麻。为了赔不是，我就教伊白相抽陀螺。后来路上碰到，小家伙还主动跟我打招呼，心里头暖烘烘个。

抽陀螺不光是个游戏，还是项轻量个健身运动。夏天白相出身汗，排排毒；冬天白相得身浪暖洋洋个；春秋白相，舒筋活血防酸痛。还有个好处老重要个，手脑并用，还能让心态保持年轻。