一人扇风两人凉

微信扫码看视频听钱程沪语朗读

◆储有明

辣辣电风扇还呒没普及个年代，记忆里每到热天，无线电里经常播放扬州小调：“一把扇子七寸长啊，一人扇风两人凉……”搿搭提到个就是折扇。

早年上海有点派头个男人，像掮客、戏园老板或者是账房先生之类个，热天出门总归要随身带一把7寸长个折扇。迭种人热天打扮相当考究：上身一件白麻纱短衬衫，下身配一条凡立丁背带西裤，就跟电影《舞台姐妹》里李纬演个唐经理一样；也有穿黑香云纱短衫，搭浅灰色个派立斯西裤，就好比《羊城暗哨》里冯喆演个侦察员王练。

有眼家底个太太小姐，热天出门常常穿碎花乔其纱旗袍，前襟盘扣浪吊一小串栀子花、白兰花，胳肢窝纽扣旁边配一块喷过香水个小绢头，随身个小皮包里除脱香粉、唇膏，必定带一把5寸半长个王星记檀香扇。

虽然辣辣1924年，上海就安装了中国第一台空调，但是早期个空调侪是大型建筑用个中央空调，普通老百姓根本看勿到。上海四大百货公司里，只有新新公司舍得开冷气招待客人。电影院里向，只有大光明、国泰搿种首轮电影院，大热天有冷气。普通店家、饭店、写字间，顶多装一只吊扇，或者是华生牌台扇。杨树浦各家染织厂个掮客、跑街拿好印花布样跑到南京路三大祥，也就是宝大祥、信大祥、协大祥，辣辣账房间一坐定，就拿出折扇一边扇风，一边接过账房拿过来个大麦茶咪两口，就急吼吼推销新款花布。

上海孤岛期间，有批跑单帮个女商贩，三轮车装满紧俏货，车子刚刚停到公馆后门，娘姨马上出来搬东西，嘴巴里勿停个讲：“沈师母，今朝哪能有介许多好货色啦？”女单帮刚从码头或者车站赶过来，一身粗布短打，勿方便直接去见东家，老规矩先辣辣灶披间或者小厢房端一盆热水擦擦身，换一件阴丹士林旗袍，搨一点粉。楼房里向虽然有电风扇，女商贩照样拿出檀香扇慢慢摇，一边扇一边跟东家讨价还价。檀香悠悠个香气衬得气氛缓和，生意十有八九当场敲定，正应了一句老话：“一人扇风二人凉”，大热天一对一谈生意，折扇轻摇，谈价钿个火气也消脱一大半。

正因为一把漂亮个折扇某种程度浪成了身份个象征，每到热天，王星记扇庄生意是好得勿得了，除脱制作精细个檀香扇，还有勿少名人写个字画、画个扇面，假使一把折扇正反面侪画满五颜六色个京剧脸谱，主人要么是戏迷票友，或者是戏院个案目。穿纺绸短打辣辣市面浪向混个爷叔，一般喜欢斑竹扇骨个黑纸面个折扇。

现在家家人家侪有空调了，不过讲究格调个上海人，热天出门仍旧喜欢带一把折扇。