会动脑筋个鹦哥

◆邵天骏

屋里养了一只鹦哥。搿只鹦哥天生好动，学人家讲闲话是伊个拿手本事，通常勿要几天，就能学会好几句，学得活龙活现。假使侬人勿辣伊身边，老远听见有人辣辣讲闲话，讲勿定还会误以为好几个人蹲辣一道茄山河。伊勿单单一口上海闲话讲得地道，还会装出一副辣辣动脑筋个样子。特别是伊伸得长长个头颈，眼乌珠一眨一眨，认认真真听侬讲闲话个样子，我看一眼就憋勿牢想笑。

有一天，天气好得勿得了，鸟笼挂辣客厅阳台竹竿浪，鹦哥蹲辣笼子里自顾自讲上海闲话。我拿切好个苹果小块递拨伊，伊一口一块吃得有滋有味，嘴巴里还反反复复念：“勿吃勿吃，勿吃勿吃。”

我存心逗逗伊，捏一块苹果伸到笼子里头，伊刚要伸嘴啄，我手一记头缩转，伊啄了个空。鹦哥马上勿适意，哒哒哒跳到笼边浪，一副受足委屈个神情。我搭伊讲：“鹦哥，侬尽管吃，覅客气。”

搿句闲话伊从来呒没听过，更加勿会讲。只见伊一记头伸长头颈，两只眼乌珠盯牢我，我一遍一遍搭伊重复搿句闲话。伊一歇歇像听明白了，轻轻点点头；一歇歇头颈转来转去，像是辣辣动脑筋，连平日里随口乱讲个闲话也侪停脱了。

自从搿趟以后，鹦哥露出搿副动脑筋神态个次数越来越多。叫伊出笼吃生梨，伊先拉长头颈，亮晶晶个眼乌珠眨来眨去想半天，等想清爽了才肯出来尝鲜；喊伊到专用浴笼汏浴，伊探头探脑，头颈伸得老长，眼乌珠张来张去打量四面八方，确认安全，再跳出鸟笼钻到浴笼里；放伊辣房间里随便兜白相，伊照样伸长头颈，眼乌珠骨碌碌转，像辣辣想啥事体……

伊搿副样子常常冷勿丁就露出来，上门来白相个朋友、隔壁邻居看见，侪觉着稀奇，讲搿只鹦哥是真个会动脑筋个。其实我心里清爽，伊后来学会个交关上海闲话，侪是搿能介伸头颈、眨眼睛、听我讲闲话，慢慢交学得来个。

大概伊也晓得我看得懂伊一举一动，搭我特别亲热。只要看见我走进房间，伊就放开嗓门，一遍一遍用上海闲话叫：“侬好！侬好！侬好！”一边叫一边扑扇翅膀，像是辣辣热烈欢迎我。伊还老欢喜听我讲上海闲话，我一开口，伊就静静蹲辣旁边，一面仔细听，一面认认真真动脑筋。

勿知勿觉，搿只讨人欢喜个鹦哥已经成了我生活个一部分，天天搭伊讲白相，越相处越有味道。尤其伊搿副一本正经、装模作样动脑筋个样子，拨屋里添了交关乐趣，日脚过得开开心心。