绿豆冷淘浇白饭

◆ 沈一珠

果然是，一到7月，天气就勿一样了，温度一天比一天高，出门，还呒没走出几步，就有点出汗个样子了；吸口气快走两步，到树下头，只听得夜吾知拼命叫，虽然吵闹，细听听倒也单纯；多走一歇歇，汗溚溚渧，像雨落下来，勿过，天气到底是爽气交关，抬头看看，有蓝天白云，黄梅天终于结束了。

今朝早饭是绿豆薏仁百合芡实羹，昨日夜里笃好个绿豆汤，老清老早又焐了一镬子薏仁、芡实、百合；绿豆含有丰富个有机盐、维生素，薏仁健脾祛湿、利水消肿，又加了芡实百合，是因为冰箱里正好有；有人讲，绿豆薏仁有着千年个恩爱，两者结合笃汤，是大热天里顶好个养生甜品，因为大热天里人容易出汗，大量个矿物质和维生素流失，多吃绿豆薏仁，大热天里，清热解毒之余还是多种元素个补充。

两样汤各舀一半，小汤碗盛满；绿绿白白，像莫兰迪个灰白灰绿调调，安静又开胃；加一小勺糖，拌一拌，入口，勿冷勿热，苦味道里又囥了一点点甜，是让人捂心个滋味；再配两只小花卷馒头，一顿家常清凉个早饭落肚。

除脱用绿豆当早饭或者下半天个点心，古人也曾经大热天里还有拿伊当冷淘解暑个好物，清代郑孝胥有诗《食菜尾羹绿豆浇饭》为证：憎浓喜淡理谁参，舌本荤腥渐不堪。绿豆冷淘浇白饭，何如莱菔苦中甘？

大约莫意思是，啥人讲得清爽呀，就迭种清淡里向个本真味道？又或者是舌根慢慢开始受勿了荤腥？一碗用绿豆汤淘个白饭，清爽是清爽了，但要讲味道，像煞还勿及苦中带甜个萝卜？

吃饭还要讲道理，会影响胃口，讲回吃绿豆迭桩事体，绿豆辣大热天里还真是随处可见，屋里向有绿豆百合羹、绿豆粳米粥、绿豆冬瓜汤，出门有绿豆棒冰、绿豆刨冰；磨成粉可以做绿豆糕，绿豆线粉；用水浸一浸捂一捂又生出绿豆芽来了……

搿天夜里买了绿豆，第二天看配送流程，发觉又送到马路对面个驿站去了，远了一点，而且还要自己去拿；所以就联系客服，提醒伊拉绿豆到上海后送到近一点个驿站，又顺手点了催货提醒。结果，绿豆一到上海，伊拉居然叫了闪送直接送上门了，唉，上海现在个快递还真是清热解暑！