湿地风景看勿够

微信扫码看视频听钱程沪语朗读

◆邵天骏

辣辣阿拉小区西南面有片湿地，面积勿算小，大人小人侪好辣辣搿搭散散步、歇歇脚、白相相。湿地里泥土松松软软，大树搭低矮灌木丛连成一大片。湖里映出树个倒影，枝叶斑斑点点；小桥流水穿插其中，溪水清澈见底，一帧帧像精心画出来个画扑面而来。还有勿少叫勿出名个小鸟，叽叽喳喳，蹦蹦跳跳。

绿树花草围牢整片湿地，辣辣略带灰蒙蒙个天色之下，朦朦胧胧，时勿时飘起一层氤氲，看勿真切。搿层白雾慢慢叫升起来，辣辣满眼个绿色当中，一歇歇向四面散开，一歇歇又从高处落下来，高低起伏个景色看得人心里陶醉，一派美妙风光，看也看勿尽，赏也赏勿够。尤其搿片湖泊，像一块通透个白玉，镶嵌辣辣湿地当中，玲珑剔透，斜气动人。

小湖岸边，树叶随风飘曳，曲径通幽，一眼看勿到头。走辣辣小路浪自有一番闲庭信步个雅趣，波光粼粼个湖面、静卧水浪个拱桥、富有诗意个亭台，沉浸其中，怡然自得。一路走走停停，时勿时看见一方小石凳、一段小长廊、一座小石桥，还有生机勃勃个青苗拿安逸个小路搭田岸映衬得格外妩媚深情。清水搭花草相拥个湿地闻上去带一眼眼甜滋滋个味道。大大小小个路面被两边满眼绿色环抱。走辣辣风情无限、舒心适宜个湿地里，任凭思绪自由飞翔，世间所有个烦恼困顿侪随着雾气慢慢消散，心底只剩满满个欢喜。

天色慢慢清凉起来，眼睛一霎，金色阳光洒满整片树林，白云也从厚厚个云层里钻出来，勿再扭捏羞涩，一歇歇变成白雪公主个模样，一歇歇又化作一团白色个云絮，婀娜多姿。

湿地景色看勿厌，树木、花草、飞鸟，随处可见；亭台、长廊、拱桥，看得人赞叹不已。勿知勿觉中，小湖、小溪搭湖泊成了一道流动个布景，鸟语花香醉人，心情舒畅惬意，一阵微风吹来，勿经意之间，我搭阿拉屋里门口个迭片湿地形成了一个心照不宣个默契。