新春里向送“福”字

◆ 王 洪

腊月初八搿天，一位书法家来拜年，特地送来伊亲手写个两副春联，还有两幅带马年图案个大红“福”字，屋里向一下子就充满仔年味搭仔春意。

搿几天朋友圈里，侪是各式各样写“福”、送福个场景——书法家辣高铁站为旅客写春联，到社区、企业为大家写福字，医院里医患一道写，学堂里师生一齐写，还有关爱老兵个送福活动。琳琅满目个福字，侪是传统文化里最朴素、最真心个新年祝福。

史料里早有记载，过年贴“福”是老传统了。《梦粱录》里讲：“岁旦在迩，席铺百货，画门神桃符，迎春牌儿……”“士庶家不论大小家，俱洒扫门闾，去尘秽，净庭户，换门神，挂钟馗，钉桃符，贴春牌，祭祀祖宗。”当中个“春牌”，就是今朝红纸写个“福”字。我一直觉着，手写福字是过年最温柔个仪式，勿像印刷体介刻板，每一笔侪带着书写者个心意搭仔温情。

再看虹桥高铁站候车大厅，书法家们凝神屏息、运笔如风，红纸黑墨，辣伊拉笔下生出交关韵味——有个福字端庄厚重，像泰山稳坐；有个洒脱飘逸，像行云流水。笔锋转折，是岁月沉淀；墨色浓淡，是功夫深浅。

最动人个，是书法家拿写好个福字送到旅客手里个辰光。一位穿黑外套个姑娘双手接过，眉眼弯弯，口罩也遮勿住伊个笑意。还有好多地方，书法家搭企业员工一道举起融入“2026”个创意福字，笑容里侪是欣喜与敬意。福字从指尖传到掌心，像一场温暖个接力，是对奋斗者个致敬，也是对非凡岁月个礼赞。

细看搿些福字，有个旁边写“马上有福”，有个巧妙嵌进生肖搭吉祥话。书法家笔下个福字千变万化，其中个核心祈愿——平安、健康、顺遂，从来呒没变过。辣社区写福，是邻里和谐；辣学堂写福，是寄托希望；为兵哥哥写福，是满满敬意。伊拉挥毫泼墨，为学子祝愿，为前辈致敬，祝福从笔尖落到纸上，从纸上暖到心里。

沪上好些书法家，奔波辣写福、送春联个路浪，以笔墨为马，载满祝福奔向新年。搿些红彤彤个福字，会贴辣家门口、教室窗上、老兵屋里，成为今冬最暖个颜色。愿伊拉个墨宝福泽绵长，让墨香里个祝福，岁岁年年，温暖每一个认真生活个人。