埃歇辰光追《流星花园》

◆ 赵妃蓉

去年年底，F4到上海开演唱会，虽说朱孝天是由阿信代替个，但迭个消息还是让老多粉丝激动得勿得了。我记忆里最早个偶像组合是小虎队，2010年伊拉在春晚重聚个辰光，大家侪讲小虎队已经变老虎队了，不过《青苹果乐园》前奏一响，年少青春个感觉还是一下子扑过来。

搭小虎队靠《新年快乐》专辑横空出世勿一样，当年F4出道辰光有《流星花园》电视剧撑辣后头。四个大帅哥辣戏里摆足派头，搭大S演个杉菜感情纠葛一塌糊涂，观众看得入迷得勿得了。虽说伊拉辣电视剧里从来勿好好叫上课，一天到晚轧朋友，观众还是被吃得死死个，一集一集追下去。言承旭辣戏里最出名个台词就是：“如果道歉有用，要警察做啥？”伊辣戏里犟头倔脑个样子，其实就是现在短剧里流行个霸道总裁最早个版本。

F4最红个歌，当然是《流星雨》。前阵子我看各个平台直播双子座流星雨，侪用迭首歌做背景音乐。里头最经典个歌词是：“陪你去看流星雨落在这地球上，让你的泪落在我肩膀”。但从科学角度讲，流星只不过是宇宙尘埃。辣科技勿发达个古代，要是有大陨石落辣地球浪，古人会当是勿好个兆头。比方讲秦国灭赵国之前就有陨石落下，民间侪讲是凶兆，所以迭句歌词只是词作者把浪漫爱情想象搭流星绑辣一道而已。

看到F4合体，我不由自主想起刚大学毕业、工作热火朝天个日脚。埃歇辰光没空一集一集追，侪是买DVD，有空个辰光一口气看光，所以能量密度老大个。也勿去追究剧情合理勿合理、有意义口伐，紧张工作之余，看四个帅哥搭杉菜缠来缠去，满满个青春荷尔蒙。迭个才是真正个青春记忆，纯真美好，有点戆头戆脑，但绝对是沉浸式个观剧体验。

现在我已经勿看纯偶像剧了，对脑洞大开个短剧更是看到名字就想逃。平台免费推个短剧，我好奇看过两三分钟，剧情几分钟里反转再反转，爽是爽，但观剧热情消耗得太快。我现在更加怀念当年迭些纯粹个偶像剧，伊拉为观众造了一个梦境花园。现在高科技、算法加持，情感内核反而勿纯粹了，侪是为了博眼球、硬编出来个离奇剧情。

乘地铁辰光，常常看到人家不停刷短视频，手速快得来以秒计算。我有点担心，长此以往，大脑个思考能力会勿会被短视频磨脱？所以讲，不管做啥事体，还是适可而止比较好。