洋女婿学讲上海话

◆ 周钰栋

前段辰光报纸浪登了一条新闻，讲一个外国人讨了上海老婆，做上海女婿，学上海闲话真个是劲头十足。伊勿光跟自家上海老婆讨教，还捧牢一本《老外学上海话》下功夫。练到现在，伊一口上海闲话，听上去跟从石库门弄堂里长大个本地人已经呒没啥区别了。

就算到了迭个地步，伊还勿知足，专门研究上海闲话各式各样声调。钻研下来伊发觉，上海闲话分市区闲话跟本地乡音，本地闲话再细分，南汇、奉贤、金山、松江、崇明各个郊县腔调侪勿一样。为了吃透市区跟各郊县个沪语声调，伊索性搬到郊区。一边安安稳稳过清净乡村日脚，一边打听当地风土人情，一点点学方言发音。苦学一段辰光下来，崇明、松江、青浦、奉贤、嘉定个闲话伊居然侪会讲了。

学闲话过程当中伊也看出来，现在交关上海小囡勿会讲本地闲话。长辈搭小人讲闲话，只好上海闲话、普通闲话翻来翻去切换，真叫人哭笑勿得。还有勿少郊县本地人，年轻人现在上班生活侪迁到市区，小辰光乡下老宅讲个乡音老早就忘记脱了。长此以往，上海方言真有慢慢没落个苗头，伊看辣眼里急辣心里。

为了留牢上海闲话，伊先是拍短视频示范上海闲话个发音技巧，勾起大家学上海闲话个兴致，后来索性动笔写书，专门研究上海方言。现在伊写个金山方言书稿已经定稿，马上就要出书。

其实现在科技发达，学上海闲话还能靠AI帮忙。据报道，上海大学研发个沪语大模型已经更新到2.0版本，能够沪语智能对话。我想想，有AI搭把手，勿管外国朋友还是新上海人，学上海闲话侪会省力交关，希望迭个大模型能够早点对公众开放。毕竟学好沪语，对读懂、传承海派文化大有好处。