沪语童谣唱流年

微信扫码看视频听钱程沪语朗读

◆沈顺南

辰光过得飞快，童年已经变成记忆里个一片模糊，但是只要想起沪语童谣，老早上海弄堂里个烟火气、简简单单个快乐，立刻就想起来了。从前个上海，弯弯曲曲个弄堂就是小囡们个游乐场。朗朗上口个童谣，陪着一代代小人长大，是记忆里最好听个歌声。搿点随口就能哼上几句个小调，藏着童年无拘无束个欢喜，裹着弄堂里浓浓个市井温情。我印象最深个，就是满是烟火气个《笃笃笃，卖糖粥》，搿首童谣真是刻辣骨子里、最鲜活个弄堂声音。

“笃笃笃，卖糖粥，三斤胡桃四斤壳，吃侬肉，还侬壳，张家老伯伯，请侬开开门，问侬讨只小花狗。”“笃笃笃”个声响，是卖糖粥个小贩敲竹梆发出来个。挑仔两只木桶、走街穿巷个卖粥人是当年弄堂里再寻常勿过个身影。香甜个糖粥，喷香个胡桃，再配上“三斤胡桃四斤壳”个幽默唱词，辣物资供应困难个日脚里，寻常百姓就用搿点风趣化解生活个平淡，字字句句侪是实实在在、爽朗又有人情味个市井光景。

还有一首生动有趣个《哭烛包》：“一歇哭，一歇笑，两只眼睛开大炮。一开开到城隍庙，城隍老爷哈哈笑。”短短几句话，活脱脱写出小囡喜怒勿定、天真烂漫个样子。哭一阵笑一阵，呒没半点修饰个童真。弄堂里个小朋友凑辣一道，就拿搿首童谣互相打趣。那些转眼就忘个哭闹，还有肆无忌惮个欢笑，侪成了童年里最可爱、最难忘个片段。

勿少沪语童谣，还搭弄堂游戏分勿开。大人小人席地而坐，手拉手玩“摇摆坐船”，一边轻摇身体，一边轻声歌唱：“摇啊摇，摇到外婆桥。外婆住辣长生桥，糖炒栗子呱呱叫，吃得宝宝哈哈笑。”小姑娘跳橡皮筋个辰光，踩着节奏一道唱：“马兰花，马兰花，风吹雨打侪勿怕，勤劳个人在说话，请侬马上就开花。”

辣弄堂里白相，突然落起雨来，小囡们一边嘻嘻哈哈往屋檐下奔，一边齐声喊：“落雨喽，打烊喽，小八腊子开会喽。”清脆个童声，连下雨天也变得热热闹闹。白相“官兵捉强盗”分出输赢，输个一方伸手受罚，赢个人轻轻拍下去，两个人一道唱：“本来要打万万记，现在辰光来勿及，马马虎虎打三记，一两三。”简单个游戏配上顺口个童谣，整座弄堂侪飘着自由自在个快活。

还有一首句句带“八”个童谣：“从前有个老伯伯，年纪活到八十八，早上八点钟起来，乘了八路电车，跑到八仙桥，买了一碗八宝饭，一共用了八块八角八分八厘八毫八。”一连串数字配上顺口个腔调，再加上上海闲话里“伯”和“八”读音相似。为了增加难度，要拿迭个“八”读成功趣味十足。

搿眼带着吴侬韵味、好唱又好听个童谣，是阿拉迭个一辈上海人囥辣辣心底个美好。