小辰光个“勇”字经

◆ 金洪远

我小辰光住辣海伦路瑞康里，走到海伦公园只要三分钟。当年公园里有一条“勇敢者道路”名气响得勿得了。对阿拉上海小囡来讲，尤其男小囡，搿搭就是最闹猛、最扎劲个白相天堂。

每到礼拜天一早，公园门口就排起长队。人还呒没进去，心早就飞到勇敢者道路了。第一关要趴辣地浪钻铁丝网，宽宽个铁网铺辣地面，小囡整个人贴牢地皮，一点点往前挪，就怕衣裳拨铁丝网钩破。钻出来拍脱身浪向个灰，好比打赢一场仗，心里老得意个。

再往前就是独木桥，狭格格个，走上去心浪向突突跳。还有铁索桥，摇摇晃晃立勿稳，双手抓牢铁索，脚底下踩稳木板，一步步挪到对面，满头大汗，却笑得邪气开心。

沙坑旁边个悬梯最考手劲，两根铁索吊牢一排横木，大家像小猴子一样荡来荡去往前挪。手劲足个，一口气能来回好几趟；撑勿牢个索性直接往沙坑里一跳，沙地软笃笃个，一点也勿疼。旁边还有两部迷彩坦克，车身画着红五星，小囡从底下钻进去，再从炮塔爬出来，个个想象自家就是解放军战士。

弄堂里有个邻居小囡叫大头，个头比别个小囡大出一圈。有一趟大家白相“捉强盗”，阿拉身子瘦小，头颈一缩，侧身就从铁栏杆缝里钻出去了。大头也想学样钻，哪晓得头硬生生卡辣当中，进也进勿进，出也出勿出，急得哇哇大哭。阿拉几个小伙伴一道用力扳栏杆，喊一声“嗨”，栏杆扳开一点点空隙，大头总算顺势滑了出来。刚刚还哭得眼泪汪汪，一脱困立马破涕为笑。旁边一位阿姨看辣也夸伊，讲搿小朋友倒是蛮勇敢。

还有个邻舍小囡，绰号叫“小老鼠”，从小身子弱，胆子又小。头一趟来公园，啥物事侪勿敢白相。看大家玩得热热闹闹，伊慢慢也鼓起勇气尝试。走独木桥抖抖豁豁，足足走了五分钟；爬悬梯爬到第三根横木就跌了下来。但伊跌了再爬，一趟勿行再来一趟，久而久之，胆子大了，身子也结实了。后来伊插队去了东北农场，有一回看见小囡落河，想也没想就跳下去救人。想起来，当年海伦公园里个“勇敢路”对培养伊个勇敢正直也是有作用个。勇敢勿是天生啥也勿怕，而是哪怕心里慌，脚步仍旧朝前走；也勿是受了痛、受了委屈勿会哭，而是哭过痛过，揩干眼泪往前冲。

有辰光想想老早，阿拉小辰光放学，自家背书包走回家，白相也是搭伴到处跑，跌跤了就自家爬起来。再看看现在，勿少小囡放学，阿爷阿娘贴身保护，还要帮忙背书包。日脚是安逸了，却少了当年摸爬滚打个野趣，也少了独自面对难处个胆量。

从前个勇敢者道路，闯个是眼前个障碍，练个是筋骨，磨个是心性。那段风里跑、汗里拼、吃苦也硬撑个童年辰光，永远留辣阿拉心底，闪闪发亮。搿份精气神，才是我最难忘个回忆。