淀浦河边忆往昔

◆ 周爱民

老友搬去新小区，喊我去伊屋里坐坐。伊讲淀浦河就从门前流过，两岸景致交关好，学堂还常常组织学生到搿搭春游。

吃中饭个辰光，老友指着台子浪个爆鱼、红烧甩水讲：“迭条青鱼，就是我昨日从淀浦河里钓上来个，差勿多有二十斤重。”我勿由得感叹：“真额结棍，河水清，鱼也长得大。”

吃好饭，我陪老友走到百米开外个淀浦河边。清风徐徐，河水微波荡漾，花香阵阵，树叶沙沙作响，鸟儿飞来飞去叫个勿停。步道浪游客慢悠悠散步，河边还有几个人垂钓，对岸一群阿姨正辣跳广场舞，斜气闹猛。

阿拉两家头呼吸清新空气，听听鸟鸣、闻闻花香。忽然听见旁边一对祖孙辣辣聊天。穿校服个大眼睛小姑娘摇着白发老人个手问：“老师讲淀浦河全长46公里，老早叫蒲汇塘，1971年才改名叫淀浦河。阿爹，侬以前参加过开挖搿条河，阿好讲拨我听听？”

老人七十多岁，一口本地口音，笑着答应下来：“挖河是1976年冬天，当时政府动员了十几万民工。埃歇辰光我刚过二十岁，还是青年突击队队长。当时呒没啥机器设备，侪靠人力。每人一根扁担、两只竹畚箕再加一把铁锹，一趟要挑百来斤河泥，从河底一步步爬上十来米高个河岸，倒脱再回头继续挑。”

小姑娘又问：“一天要跑几十趟，实在太辛苦了。阿爹，侬是勿是辣挖河工地浪认得阿奶个？”

老人摸摸伊个头笑道：“是个呀。当时天寒地冻，地皮冻得硬邦邦，挑担走辣路浪脚底板痛得勿得了；太阳一晒，地浪又变成烂泥塘，只能穿仔高筒套鞋做生活。我向来冲辣最前头，队里个小伙子也个个卖力，从早做到夜，夜里头沾到枕头就困着了。侬阿奶搿辰光是赤脚医生，勿少小伙子侪欢喜伊。后来我腰受了伤，伊天天帮我敷药，还偷偷送红烧肉拨我补身体。一来二去，阿拉就走到一道了，讲起来淀浦河还是阿拉个大媒人，真个是因祸得福。”

老人讲完，眼角带着笑意，小姑娘也咯咯笑起来，我搭老友忍勿住，跟着一道笑了。

阿拉走上前，对着老人竖起大拇指：“前人栽树后人乘凉，现在个淀浦河既能排涝、灌溉、行船，还串起了一大片风景，侬实在是有功之人！”

老人憨厚地摇摇手，望着河面讲：“侪是应该做个，好汉勿提当年勇咯。”

暖阳下个淀浦河水流平缓，波光闪闪。成群鹭鸟有个立辣河滩浪，有个飞辣天浪向。两只白鹭贴着水面翻飞觅食，姿态轻盈，好像一对翩翩起舞个搭档。